O Portal Educativo da Xunta de Galicia migra a unha plataforma renovada e con orientación á cidadanía

• Os usuarios da web da Consellería de Educación poden agora atopar con maior facilidade os asuntos do seu interese
• O renovado portal sostén a súa estrutura sobre a diferenciación de contidos para os distintos colectivos, a actualidade e os servizos

O Portal Educativo da Xunta de Galicia vén de migrar a unha plataforma web renovada, na que os usuarios da web poden acceder dun xeito máis dinámico á información da Consellería de Educación e aos servizos ofrecidos por este departamento.

A nova web presenta unha estrutura unificada co resto dos portais da Xunta de Galicia, o que redunda nunha maior accesibilidade para o usuario, que atopa as mesmas referencias en todas as web. Ademais, o portal está enmarcado dentro das iniciativas da Xunta de Galicia a prol do software libre. Esta aposta quere establecer unha referencia tecnolóxica dun gran sistema baseado en software libre, de xeito que a propia Consellería sirva como exemplo dentro do eido educativo sobre o uso deste tipo de software. Complementariamente, optar por unha plataforma baseada en software libre mellorará a súa futura evolución, facilitando a incorporación de funcións e servizos dirixidos a achegar a administración electrónica a todos os eidos educativos e para implantar e fomentar o uso das TIC no proceso educativo.

A parte principal da páxina de inicio sostense sobre os piares dos servizos, a actualidade e os anuncios, presentados con atractivos elementos gráficos e unha estrutura limpa e clara. Na parte superior, a información aparece compartimentada por colectivos, co que os usuarios poden atopar dun xeito máis sinxelo a información do seu interese. Outra das novidades do Portal educativo é a incorporación dun buscador cunha mellorada funcionalidade, que permite incluso a busca avanzada por temas, colectivos ou departamentos.

Tras esta migración, a Subdirección Xeral de Sistemas Informáticos da Consellería de Educación segue a traballar para conseguir unha plataforma flexible de tal xeito que se poidan incorporar no futuro servizos complementarios tales como ferramentas de traballo colaborativo, e ampliar os servizos ofrecidos.

Fonte: www.edu.xunta.es