Culturgal é unha gran casa construída entre os distintos gremios da
cultura: libro, creación audiovisual, artes escénicas, música, deseño,
internet e novas tecnoloxías. Un fogar coas portas e ventás abertas
sempre cara á sociedade. Un evento único, de periodicidade anual, que
chega á súa quinta edición consolidado como a gran cita das industrias
creativas en Galicia.
A Feira das Industrias Culturais de Galicia é moito máis que un
encontro profesional. Culturgal é unha romaría á que acoden cada ano
miles de persoas para coñecer de primeira man as novidades editoriais, o
último en música, o glamour do audiovisual, a maxia das artes
escénicas, os avances das novas tecnoloxías e mesmo as propostas máis
marxinais en tres días de actividade sen tregua. Tres días de intenso
traballo conxunto que convirten tamén a Feira nun lugar de encontro
privilexiado para os axentes do sector, un espazo para a reflexión e a
aprendizaxe, no que intercambiar experiencias e imaxinar novos proxectos
baseados na colaboración e no apoio mutuo.
Culturgal está organizado por unha entidade da que forman parte as
asociacións profesionais máis representativas do sector: Asociación
Galega de Editores (AGE), Asociación Galega de Empresas de Artes
Escénicas (Escena Galega), Asociación Galega de Produtoras Fonográficas
(Agaphono), Empresas Galegas Adicadas a Internet e ás Novas Tecnoloxías
(Eganet), Asociación Galega de Produtoras Independentes (Agapi). A Feira
conta co patrocinio da Xunta de Galicia, a través da AGADIC e da
Secretaría Xeral de Política Lingüística, do Concello de Pontevedra, do
Ministerio de Educación, Cultura e Deporte e conta coa colaboración de
máis de 30 entidades e empresas. No eido das industrias culturais,
Culturgal é sen dúbida o proxecto coa rede máis ampla de colaboradores
institucionais, asociativos e empresariais.
Culturgal é a casa da cultura en Galicia. A vosa casa. Entrade ata a cociña.
Toda a información a un click
- Descarga o programa xeral (pdf)
- Descarga o dossier de prensa (pdf)
- Consulta o programa completo na web
- Consulta o mapa de entidades na web
Eres profesional das industrias creativas, estudiante, creador/a ou simplemente tes curiosidade polo funcionamento do sector cultural? Resumímosche as oportunidades que che ofrece Culturgal 2012 nesta guía da programación profesional.
Se non vas poder vir á Feira, revisa a programación que retransmitiremos en streaming grazas a Redelibros, aquí.
Toda a información sobre o Culturagal en http://culturgal.com/
Recibide un cordial saúdo
0 comentarios:
Publicar un comentario